शिक्षक वाऱ्यावर आणि शिक्षक आमदार धुर्‍यावर!

चांदा ब्लास्ट

राज्यातील शिक्षण व्यवस्था पूर्णपणे भ्रष्टाचारात बुडालेली असून याच राज्यातील सात शिक्षक आमदार मात्र या शैक्षणिक भ्रष्टाचाराबाबत एक शब्दही बोलत नाही. अनेक वर्षापासून राज्यातील शिक्षण व्यवस्था ही खालावत चालली असून भ्रष्टाचारात अखंड बुडालेली आहे. शिक्षण संस्थाचालक व शिक्षण अधिकारी यांच्या संगमताने शिक्षकांचे व विद्यार्थी, पालकांचे अतोनात नुकसान होत आहे.

शिक्षण क्षेत्राला लाभलेले सात शिक्षक आमदार व सात पदवीधर आमदार यांच्याकडे खरी म्हणजे या बाबीकडे लक्ष देण्याची आवश्यकता आहे. परंतु हे आपल्या स्वतःच्या स्वार्थात एवढे अखंड बुडालेले आहे की त्यांना आपल्या क्षेत्रातील शिक्षण व्यवस्था व शैक्षणिक सुधारणा करिता काही सोयरे सुतुक राहिले नाही. त्यांना फक्त आपलं राजकारण करीत आमदारकीची मजा घ्यायची आहे.

मराठी माध्यमाच्या शाळाचा दर्जा खालावत चालला असून अनेक शाळा बंद होत चालले आहे. तसेच सरकारी शाळेची स्थिती ही फार काही चांगली राहिली नाही. शिक्षक आमदार व पदवीधर आमदार यांनी शासनाला खरं म्हणजे या सुधारणा करण्यासाठी व उपाययोजना करण्यासाठी सांगण्याची गरज आहे. परंतु ते मात्र आपल्या तोंडाला कुलूप लावून बसले आहे.

प्रायव्हेट शाळेचे शिक्षण संस्थाचालकांना मात्र मोकाट सुटले असून त्यांना कोणी आवर घालण्याचा प्रयत्न करीत नाही. त्यांना कोणत्याही शैक्षणिक कायद्याची भीती नसून मन मानेल त्याप्रमाणे ते फी आकारून, डोनेशन घेऊन शिक्षण क्षेत्राचे वाटोळे करीत आहे. तसेच विद्यार्थी व पालकांचे शोषण करीत आहे. बेरोजगारी असल्यामुळे शिक्षित युवक प्रायव्हेट शाळेत नोकरी करता जात असून तिथेही त्यांना प्रायव्हेट शिक्षण संस्था चालकातर्फे त्रास दिल्या जात असून फार अल्प अशा मानधनावर त्यांच्याकडून वाजवीपेक्षा जास्त कामे करून घेतल्या जात आहे.

 शालेय कायदा चे पुरेपूर उल्लंघन होत असतानाही व शिक्षक संघटना अनेक तक्रारी च्या माध्यमातून हा प्रश्न मांडत असूनही त्याकडे सोयीस्करपणे शिक्षण विभाग व शिक्षक आमदार दुर्लक्ष करीत आहे.

स्वातंत्र्य प्राप्त होऊन 75 वर्ष उलटूनही शिक्षण क्षेत्रातील पेशाला कलंकित करणारे शिक्षण संस्था चालक व शिक्षणाधिकारी सन्मानाने समाजात वावरत , शिक्षकाची पिळवणूक करीत आहे व शिक्षकांचे कैवारी म्हणून शासन दरबारी गेलेले शिक्षक आमदार व पदवीधर आमदार कुंभकर्ण झोपेत आहे.

 *यात मात्र एकमेव माजी शिक्षक आमदार नागोजी गाणार हे मात्र सदैव एक पहारेकरी म्हणून शिक्षण क्षेत्रातला दीपस्तंभ ठरला असून त्यांनी शैक्षणिक भ्रष्टाचाराचा करोडो रुपयांचा घोटाळा जनतेसमोर आणला असून अनेक मोठे अधिकारी व संस्थाचालक यात अडकले आहे.*

आता तरी विद्यमान शिक्षक आमदार व पदवीधर आमदारांनी जनाची नाही तर मनाची लाज बाळगून या भ्रष्टाचारी प्रवृत्तीच्या लोकांना कठोर शिक्षा देण्यासाठी सरकारवर दबाव आणावा व शोषित शिक्षक कर्मचाऱ्यांना शैक्षणिक कायद्यानुसार पूर्ण न्याय मिळण्यासाठी कडक उपाययोजना करावी अन्यथा असेच म्हणावे लागेल की शिक्षक वाऱ्यावर व शिक्षक आमदार धुर्‍यावर.

विवेक आंबेकर चंद्रपूर.