देशव्यापी एकदिवसीय संप : कोळसा कामगारांच्या मागण्या घेऊन संयुक्त संघर्ष समितीचे आंदोलन

 चांदा ब्लास्ट

वणी क्षेत्र / कोल इंडिया – देशातील प्रमुख केंद्रीय कामगार संघटनांच्या आवाहनावरून ०९ जुलै २०२५ रोजी अखिल भारतीय कोळसा उद्योगामध्ये एकदिवसीय संप पुकारण्यात आला. या संपाचे आयोजन HMS, AITUC, INTUC आणि CITU या प्रमुख संघटनांनी केले आहे.

हा निर्णय ०५ मे २०२५ रोजी रांची येथे आयोजित सर्व केंद्रीय कामगार संघटनांच्या संयुक्त बैठकीत घेण्यात आला होता. या बैठकीत सरकारच्या कामगारविरोधी धोरणांवर, खासगीकरणावर, कंत्राटी पद्धतीवर आणि वेतन विसंगती यांसारख्या अनेक मुद्यांवर चिंता व्यक्त करण्यात आली होती. संपाची तारीख ०३ जुलै रोजी अंतिमतः निश्चित करण्यात आली.

संपात सहभागी कामगारांच्या प्रमुख मागण्या पुढीलप्रमाणे:

कोल इंडिया आणि सिंगरेणी कोळसा कंपनीमध्ये खासगीकरण, कंत्राटी प्रणाली आणि विनिवेश थांबवावा.

बंद असलेल्या खाणी पुन्हा सुरू कराव्यात आणि नवीन कोळसा ब्लॉक्स खासगी कंपन्यांना देण्याची प्रक्रिया थांबवावी.

कामगारांना ₹२६,००० किमान वेतन, ८ तासांचा कामकाळ आणि सामाजिक सुरक्षेचे सर्व फायदे मिळावेत.

कायम नोकरी, समान कामासाठी समान वेतन आणि भरती प्रक्रियेत पारदर्शकता सुनिश्चित करावी.

४५ वर्षांपेक्षा अधिक वयाच्या कामगारांच्या कामावरून काढून टाकण्यावर बंदी आणावी आणि त्यांना पर्यायी रोजगार द्यावा.

२०२२ मध्ये संपलेला JBCCI वेतन करार तात्काळ लागू करण्यात यावा.

कोल इंडिया आणि SCCL मध्ये कार्यरत महिलांना रोस्टरमध्ये समान संधी मिळावी.

निवृत्त कर्मचाऱ्यांना दरमहा ₹९,००० पेन्शन मिळावी.

या मागण्यांसाठी देशभरातील कोळसा कामगारांनी संपात सहभाग घेतला असून वणी क्षेत्रातही मोठ्या प्रमाणावर प्रतिसाद पाहायला मिळत आहे. या संपास मोठा पाठिंबा मिळत असून तो यशस्वी करण्यासाठी आवाहन करण्यात आले आहे.

संयुक्त संघर्ष समिती (वे.को.ली.), ज्यामध्ये HMS, AITUC, INTUC, CITU व अन्य संघटना सहभागी आहेत, त्यांनी सर्व श्रमिकांना भारत सरकारच्या “कामगारविरोधी, जनविरोधी व राष्ट्रविरोधी” धोरणांविरोधात एकत्र येण्याचे आवाहन केले आहे.

कोळसा कामगार एकता झिंदाबाद! – श्रमिक संघटनांची एकता झिंदाबाद!

ही संप केवळ कामगारांच्या हक्कांसाठी नसून देशातील सार्वजनिक क्षेत्राचे संरक्षण करण्यासाठीची एक मोठी लढाई असल्याचे स्पष्ट करण्यात आले आहे.