घुग्घुसमध्ये ट्रान्सपोर्टर्सचा मनमानी कारभार

चांदा ब्लास्ट

घुग्घुस (चंद्रपूर) : एम.आर.आय.डी.सी.च्या बांधकाम क्षेत्रात ट्रान्सपोर्ट चालक आणि मालकांची मनमानी कमालीची वाढली आहे. वाहतूक नियमांचा सर्रास भंग केला जात असून, पोलीस प्रशासन मूकदर्शक बनले आहे. नुकत्याच एका ट्रक चालकाने किरकोळ वादातून तलवार काढल्याची घटना घडली असून, यामुळे परिसरात खळबळ माजली आहे.

वाहतूक नियमांचा भंग आणि पोलिसांची उदासीनता

सूत्रांच्या माहितीनुसार, राजीव रत्न चौक हा अवजड वाहनांसाठी प्रतिबंधित क्षेत्र आहे, मात्र पोलिसांच्या दुर्लक्षामुळे येथे दिवसाढवळ्या ट्रकांची सर्रास वाहतूक सुरू आहे. यामुळे रस्त्यांवर गोंधळ निर्माण होत असून, नागरिकांना प्रचंड त्रास सहन करावा लागत आहे. स्थानिक नागरिकांच्या म्हणण्यानुसार पुलाखाली आणि त्याच्या आसपास ट्रान्सपोर्टर्सची दादागिरी वाढली आहे, परिणामी वारंवार वाहतूक कोंडी होत आहे.

पोलिसांच्या निष्क्रियतेवर नागरिक आक्रमक

शनिवार, १५ फेब्रुवारी २०२५ रोजी झालेल्या वाहतूक कोंडीदरम्यान एका ट्रक चालकाने तलवार काढली, त्यामुळे परिस्थिती अधिक बिघडली. पोलिसांनी आरोपीला ताब्यात घेतले असले तरी नागरिकांच्या मते ही केवळ वरवरची कारवाई आहे.

घुग्घुस परिसरातील वाहतूक व्यवस्था पूर्णपणे कोलमडली असून, ट्राफिक पोलीस केवळ सुभाष नगर चौकीत बसून राहतात आणि कोंडी झाल्यावरच हालचाल करतात. स्थानिक नागरिकांनी पोलिसांवर निष्क्रियतेचा आरोप करत, ही उदासीनता मोठ्या दुर्घटनेला आमंत्रण देत असल्याचे म्हटले आहे.

प्रशासनाने कठोर पावले उचलावीत

स्थानिक नागरिकांनी पोलीस अधीक्षक (SP) आणि उपविभागीय पोलिस अधिकारी (DYSP) यांना आवाहन केले आहे की त्यांनी स्वतः घुग्घुसमध्ये येऊन परिस्थितीचा आढावा घ्यावा आणि सर्वसामान्य नागरिकांना सुरक्षितता प्रदान करावी. तसेच, बांधकाम क्षेत्रात नियमांचे उल्लंघन करणाऱ्या ट्रान्सपोर्टर्स आणि अधिकाऱ्यांवर कठोर कारवाई करण्यात यावी.

जर प्रशासनाने वेळीच लक्ष दिले नाही, तर भविष्यात या भागात कायदा-सुव्यवस्थेची गंभीर समस्या निर्माण होऊ शकते. आता प्रश्न असा आहे की, पोलीस आणि प्रशासन या बेकायदेशीर प्रकारांना आळा घालतात की नागरिकांना असाच त्रास सहन करावा लागतो?