चांदा ब्लास्ट प्रतिनिधी. अतुल कोल्हे
आयुध निर्माणी वसाहती मधील इंद्रप्रस्थ गार्डनच्या मागे भद्रावती शहरातील खापरी वार्डातील रामटेके सोसायटी येथे गेल्या चार दिवसापासून धुमाकूळ घालणारा बिबट अखेर पिंजऱ्यात अडकला. ही घटना शनिवार दिनांक २२ फेब्रुवारीला सकाळी ६ वाजताच्या सुमारास उघडकिस आली.
शहरातील खापरी वार्डातील रामटेके सोसायटी परिसरात बिबट्याने गेल्या आठवड्यापासून धुमाकूळ घातल्याची तक्रार तेथील नागरिकांनी येथील वनविभागाकडे केली होती.त्या अनुसंगाने वनविभागाने आयुध निर्माणी वसाहतीतील इंद्रप्रस्थ गार्डन मागे असलेल्या रामटेके सोसायटी खापरी येथे बिबट्याला अडकविण्यासाठी पिंजरा लावण्यात आला होता. शेवटी चार दिवसानंतर बिबट हा शनिवारच्या मध्यरात्री पिंजऱ्यात अडकला. ही बाब सकाळी ६ वाजता वन विभागाच्या अधिकाऱ्यांना निदर्शनास आणून दिली.
वन विभागाचे वनपरिक्षेत्र अधिकारी किरण धानकुटे यांच्या मार्गदर्शनात क्षेत्र सहाय्यक विकास शिंदे, बीट वनरक्षक धनराज गेडाम,वनमजूर पवन मांढरे, अनिल शेंद्रे, किशोर मडावी, महादेव मडावी, नितीन राऊत, कैलास आदींनी घटनास्थळी जाऊन पंचनामा करून सदर बिबट्याला जंगलात नेऊन सोडले. सदर बिबट हा अंदाजे साडे ३ वर्षाचा असून नर प्रजातीचा आहे.
