पिकविमा आणि अतिवृष्टीची मदत मंजूर करून शेतकऱ्यांना वितरित करा

चांदा ब्लास्ट प्रतिनिधी. प्रा. अशोक डोईफोडे

        तालुक्यात खरीप 2024 मध्ये अतिवृष्टी व सततच्या पावसाने अनेक मंडळांमध्ये शेती पिकांची अतोनात नुकसान झालेले होते. नुकसान भरपाई चा सर्वे करून याबाबत अहवाल देखील संबंधित विभागाने शासन स्तरावर पाठवलेला असताना देखील अग्रीम पिक विमा आणि अतिवृष्टीची शासकीय मदत वाटप करण्यासंदर्भात कोणतीही हालचाल शासन स्तरावर दिसत नाही. 2024 खरीप हंगामातील रखडलेला पिक विमा व अतिवृष्टीची मदत मंजूर करून तात्काळ शेतकऱ्यांना वितरित करा,अन्यथा तीव्र स्वरूपाचे आंदोलन करण्याचा इशारा राष्ट्रवादी काँग्रेस शरदचंद्र पक्षाचे तालुका अध्यक्ष राजेश इंगळे यांनी तहसील प्रशासनाला दिला आहे.

     राष्ट्रवादी काँग्रेस पार्टीने दिलेल्या निवेदनात नमूद आहे की, देऊळगाव राजा तालुक्यातील अनेक मंडळांमध्ये 2024 खरीप हंगामात अनेक वेळा सतत पाऊस व अतिवृष्टी झालेली आहे. सोयाबीन, कापूस,कांदा, तूर,मूग,उडीद व इतर सर्व पिकांचे अतोनात नुकसान झाले होते. नुकसान भरपाई चा सर्वे करून याबाबतचा अहवाल देखील संबंधित विभागाने शासन स्तरावर पाठवलेला आहे. मात्र अद्यापही नुसकान ग्रस्त शेतकऱ्यांना शासनाची अतिवृष्टीची मदत व अग्रीम पिक विमा मिळालेला नाही. ज्यात शेकडो शेतकऱ्यांचा समावेश आहे.

शेतकरी आक्रीम पिक विमा व शासनाकडून मिळणाऱ्या मदती कडे अपेक्षा लावून बसलेले आहेत.मात्र आधी आचारसंहिता आणि आता निवडणुका संपून देखील अग्रीम पिक विमा संदर्भात कसल्याही हालचाली शासन स्तरावर होताना दिसत नाही. यासंदर्भात तहसील प्रशासनाने तात्काळ दखल घेऊन अग्रीम पिक विमा व शासकीय अतिवृष्टीची मदत मंजूर करून नुकसानग्रस्त शेतकऱ्यांना वितरित करावी,अशी मागणी राष्ट्रवादीचे तालुका अध्यक्ष राजेश इंगळे, शहराध्यक्ष विजय खांडेभराड, रफिक भाई, इस्माईल बागवान, युवक शहर उपाध्यक्ष अभी खांडेभराड,दीपक मस्के, आत्माराम चित्ते, सचिन कोल्हे आदींनी केली आहे.