चांदा ब्लास्ट
घुग्घूस, चंद्रपूर : घुग्घूस शहरात शनिवारी पहाटे एका युवकाने नदीत उडी घेतल्याची माहिती मिळाल्यानंतर सुरू करण्यात आलेल्या शोध व बचाव मोहिमेदरम्यान सायंकाळी सुमारे ४.३० वाजता साबिर नावाच्या युवकाचा मृतदेह नदीच्या पाण्यात आढळून आला.
प्राप्त माहितीनुसार, शनिवारी रात्री सुमारे १.२० वाजता सदर युवक नदीजवळील पुलियावर असल्याची माहिती समोर आली होती. घटनेच्या वेळी युवकाने व्हिडिओ कॉलद्वारे आपण पुलियावर असल्याची माहिती आपल्या मित्रांना दिल्याचे सांगण्यात येत आहे. त्यानंतर मित्र व नातेवाईकांनी घटनेची माहिती घुग्घूस पोलिसांना दिली.
माहिती मिळताच घुग्घूस पोलीस तसेच बचाव पथक घटनास्थळी दाखल झाले आणि नदीत युवकाचा शोध सुरू करण्यात आला. अनेक तासांच्या प्रयत्नांनंतर शनिवारी सायंकाळी सुमारे ४.३० वाजता युवकाचा मृतदेह नदीतून बाहेर काढण्यात आला.
पोलिसांनी आवश्यक पंचनामा कारवाई पूर्ण केल्यानंतर मृतदेह शवविच्छेदनासाठी चंद्रपूर येथे पाठविला आहे. युवकाने नदीत उडी का घेतली, यामागे नेमके कोणते कारण होते, याबाबत अद्याप स्पष्ट माहिती समोर आलेली नाही. घुग्घूस पोलीस घटनेच्या विविध बाजूंचा तपास करीत आहेत.
अशा प्रकारच्या घटना सातत्याने समोर येत असल्याने शहरात चिंता व्यक्त होत आहे. या घटनांमागील सामाजिक, कौटुंबिक अथवा इतर संभाव्य कारणांचा शोध घेण्यासोबतच संवेदनशील ठिकाणी सुरक्षा व्यवस्था आणि प्रतिबंधात्मक उपाययोजना अधिक प्रभावी करण्याची गरज असल्याचे नागरिकांकडून व्यक्त होत आहे.
वृत्त लिहेपर्यंत पोलिसांचा तपास सुरू असून, घटनेशी संबंधित अधिक माहितीची प्रतीक्षा होती.
