अंढेरा जि.प. केंद्रीय मराठी प्राथमिक शाळेचे शिष्यवृत्ती परीक्षेत यश

चांदा ब्लास्ट प्रतिनिधी प्रा. अशोक डोईफोडे

दऊळगाव राजा :- ग्रामीण भागातील गुणवत्तापूर्ण शिक्षणाचा उत्कृष्ट नमुना ठरलेल्या जिल्हा परिषद केंद्रीय मराठी प्राथमिक शाळा, अंढेरा (ता. देऊळगाव राजा) येथील विद्यार्थ्यांनी प्राथमिक शिष्यवृत्ती परीक्षा २०२६ मध्ये घवघवीत यश संपादन केले आहे. परीक्षेला बसलेल्या १९ विद्यार्थ्यांपैकी तब्बल १० विद्यार्थी शिष्यवृत्तीस पात्र ठरले असून, शाळेच्या गुणवत्तापूर्ण शैक्षणिक परंपरेला पुन्हा एकदा उजाळा मिळाला आहे. या यशामुळे संपूर्ण अंढेरा परिसरात आनंदाचे वातावरण निर्माण झाले आहे.

या परीक्षेत कु. आराध्या नंदकिशोर दांडगे हिने ३०० पैकी २३६ गुण (७८.६७ टक्के) मिळवत उल्लेखनीय यश संपादन केले. शाळेतील सर्वाधिक गुण मिळवून तिने शाळेचा तसेच गावाचा नावलौकिक वाढविला आहे.
शिष्यवृत्तीस पात्र विद्यार्थी
कु. आराध्या नंदकिशोर दांडगे – २३६/३०० (७८.६७%)
निखिल राजू राऊत – ७४.६७%
कु. आराध्या अजय जाधव – ७३.३३%
अभिषेक अनंता सानप – ७३.३३%
ओम गणेश सानप – ७०.००%
कु. कोमल भगवान काकड – ६९.३३%
ओम शंकर घधरे – ६८.६७%
मोईन मोहसीन शाह – ६७.३३%
आदिनाथ गजानन महामुने – ६६.००%
कु. त्रिशा संजय बेल्टे – ५७.३३%

या यशामागे शिक्षकांचे नियोजनबद्ध अध्यापन, नियमित सराव परीक्षा, विद्यार्थ्यांवर घेतलेले वैयक्तिक लक्ष आणि सातत्यपूर्ण मार्गदर्शन महत्त्वाचे ठरले. विद्यार्थ्यांनीही मेहनत आणि जिद्दीच्या बळावर हे यश संपादन केले.
या उल्लेखनीय निकालाबद्दल पालकांनी शाळेतील केंद्रप्रमुख, मुख्याध्यापक व सर्व शिक्षकवृंदाचे मनापासून आभार मानत त्यांच्या परिश्रमाचे कौतुक केले. तसेच शाळा व्यवस्थापन समिती, ग्रामस्थ आणि शिक्षणप्रेमींनी यशस्वी विद्यार्थ्यांचे व शिक्षकांचे अभिनंदन करून पुढील वाटचालीस शुभेच्छा दिल्या. ग्रामीण भागातील विद्यार्थ्यांनाही योग्य मार्गदर्शन मिळाल्यास ते उत्कृष्ट यश मिळवू शकतात, हे अंढेरा येथील जिल्हा परिषद शाळेने पुन्हा एकदा सिद्ध केले आहे.