शाळांच्या ५०० मीटर परिसरात एनर्जी ड्रिंक्सच्या विक्रीवर बंदी

चांदा ब्लास्ट प्रतिनिधी. राजेश डोंगरे

गोंडपिपरी :_ विद्यार्थ्यांमध्ये वाढत्या प्रमाणात होत असलेल्या एनर्जी ड्रिंक्सच्या सेवनावर नियंत्रण आणण्यासाठी राज्य शासनाने कठोर पाऊल उचलले आहे. शाळकरी मुलांच्या आरोग्याला प्राधान्य देत राज्यातील सर्व शाळांच्या ५०० मीटर परिसरात कॅफिनयुक्त एनर्जी ड्रिंक्स तसेच आरोग्यास अपायकारक खाद्यपदार्थांच्या विक्रीवर बंदी घालण्याचे निर्देश संबंधित विभागांना देण्यात आले आहेत. या आदेशाचे उल्लंघन करणाऱ्या विक्रेत्यांवर अन्न सुरक्षा व मानके कायद्यानुसार कठोर दंडात्मक कारवाई करण्यात येणार असल्याची माहिती अन्न व औषध प्रशासनाने दिली आहे.

आरोग्य तज्ज्ञांच्या मते, एनर्जी ड्रिंक्समध्ये कॅफिन आणि साखरेचे प्रमाण अधिक असल्याने त्याचा मुलांच्या शारीरिक व मानसिक आरोग्यावर विपरीत परिणाम होऊ शकतो. अशा पेयांच्या अतिसेवनामुळे झोपेचा अभाव, हृदयाचे ठोके वाढणे, चिडचिड, अस्वस्थता, एकाग्रतेचा अभाव तसेच इतर आरोग्यविषयक समस्या निर्माण होण्याची शक्यता असते. त्यामुळे विद्यार्थ्यांनी अशा पेयांपासून दूर राहून पाणी, दूध, ताक, लिंबूपाणी आणि ताज्या फळांच्या रसासारख्या नैसर्गिक व पौष्टिक पेयांना प्राधान्य द्यावे, असे आवाहन करण्यात आले आहे.

बंदी लागू असलेल्या परिसरात एनर्जी ड्रिंक्स किंवा इतर अपायकारक खाद्यपदार्थांची विक्री होत असल्याचे आढळल्यास संबंधित विक्रेत्यांवर दंडात्मक कारवाईसह परवाना निलंबित अथवा रद्द करण्याची कार्यवाही केली जाऊ शकते. या निर्णयाची प्रभावी अंमलबजावणी करण्यासाठी स्थानिक प्रशासन, अन्न व औषध प्रशासन आणि संबंधित यंत्रणांना नियमित तपासणीचे निर्देश देण्यात आले आहेत.

विद्यार्थ्यांच्या आरोग्यदायी भविष्यासाठी पालकांनीही मुलांच्या आहाराच्या सवयींकडे विशेष लक्ष देण्याची गरज असल्याचे तज्ज्ञांनी नमूद केले आहे. शाळांमध्ये जनजागृती कार्यक्रम राबविणे, संतुलित आहाराचे महत्त्व पटवून देणे आणि परिसरातील विक्रीवर सातत्याने लक्ष ठेवणे आवश्यक असल्याचे त्यांनी सांगितले.

शासनाच्या या निर्णयामुळे विद्यार्थ्यांमध्ये आरोग्यदायी जीवनशैलीला प्रोत्साहन मिळेल आणि एनर्जी ड्रिंक्सच्या वाढत्या वापरावर आळा बसण्यास मदत होईल, अशी अपेक्षा व्यक्त केली जात आहे.