निलगिरी बार समोर थरकाप उडवणारा अपघात

चांदा ब्लास्ट प्रतिनिधी. नंदू गुद्देवार

ब्रम्हपुरी :_ शहरापासून हाकेच्या अंतरावर असलेल्या पारडगाव येथे गुरुवारी पहाटेच्या सुमारास एक अत्यंत भीषण आणि दुर्दैवी अपघात घडला. निलगिरी बारसमोरील नाल्यात गिट्टीने तुडुंब भरलेला हायवा ट्रक कोसळल्याने चालक आणि क्लिनरचा जागीच करुण अंत झाला. हा अपघात इतका भयानक होता की हायवाच्या केबिनचा अक्षरशः चक्काचूर झाला होता.

प्राथमिक अंदाजानुसार, हा अपघात गुरुवारी पहाटेच्या सुमारास घडला. एमएच ४० सीडी ९००२ क्रमांकाचा हायवा ट्रक गिट्टी भरून जात असताना, चालकाला अचानक झोपेची डुलकी आली. त्यामुळे चालकाचे वाहनावरील नियंत्रण सुटले आणि भरधाव हायवा रस्ता सोडून थेट रस्त्याच्या कडेला असलेल्या खोल नाल्यात कोसळला. हायवामध्ये गिट्टीचे वजन प्रचंड असल्याने अपघाताची तीव्रता कमालीची वाढली.

या भीषण दुर्घटनेत दोन तरुणांचा जागीच मृत्यू झाला. यात चालक सुरेश आनंदराव भुरले (वय ३३ वर्षे, रा. मांडळ, ता. लाखांदूर, जि. भंडारा) व क्लिनर अमित देवराव कुमरे (वय २९ वर्षे, रा. इरवा, ता. चिमूर, जि. चंद्रपूर) यांचा समावेश आहे. अपघातामुळे हायवाच्या समोरील केबिन पूर्णपणे चेपली गेली होती. त्यामुळे दोन्ही मृतदेह आतमध्येच अडकून पडले होते.

घटनेची माहिती मिळताच ब्रम्हपुरी पोलिसांनी तातडीने घटनास्थळी धाव घेतली. मात्र, केबिनचा चक्काचूर झाल्यामुळे मृतदेह बाहेर काढणे हे पोलिसांसमोर मोठे आव्हानात्मक काम होते. अखेर स्थानिक प्रशासन आणि नागरिकांच्या मदतीने, मोठ्या प्रयत्नांनंतर दोन्ही मृतदेह केबिन कापून बाहेर काढण्यात आले.

पोलिसांनी घटनास्थळाचा रीतसर पंचनामा करून दोन्ही मृतदेह शवविच्छेदनासाठी ग्रामीण रुग्णालयात पाठवले आहेत. नाल्यात पडलेला अपघातग्रस्त हायवा बाहेर काढण्याचे काम सुरू असून, ब्रम्हपुरी पोलीस या प्रकरणाचा पुढील तपास करत आहेत. या भीषण अपघातामुळे पारडगाव आणि परिसरामध्ये तीव्र हळहळ व्यक्त केली जात असून, ऐन उमेदीच्या वयात दोन तरुणांचा मृत्यू झाल्याने त्यांच्या मूळ गावी आणि कुटुंबावर दुःखाचा डोंगर कोसळला आहे