रेड झोन व नजूल जमिनीची पाहणी

चांदा ब्लास्ट

घुग्घुस, चंद्रपूर : दिनांक 12 फेब्रुवारी 2026 रोजी प्रभाग क्रमांक 10 व प्रभाग क्रमांक 11 अंतर्गत येणाऱ्या रेड झोन तसेच नजूल जमिनीची संबंधित अधिकाऱ्यांकडून पाहणी करण्यात आली. या पाहणीदरम्यान प्रभागाचे नगरसेवक, नगराध्यक्ष, नगरउपाध्यक्ष, बांधकाम सभापती तसेच इतर लोकप्रतिनिधी अनुपस्थित असल्याचे दिसून आले, त्यामुळे स्थानिक पातळीवर चर्चेला उधाण आले आहे.

पाहणीवेळी नागपूरहून आलेले अधिकारी मिश्रा, घुग्घुस नगर परिषद कार्यालयाचे अभियंता, इतर संबंधित अधिकारी, माजी घुग्घुस ग्रामपंचायत सदस्य गणेश उइके तसेच काही स्थानिक नागरिक उपस्थित होते. अधिकाऱ्यांनी जमिनीची सद्यस्थिती, निवासी भाग आणि कागदपत्रांशी संबंधित बाबींचा आढावा घेतला.

उल्लेखनीय बाब म्हणजे या प्रभागांमध्ये अल्पसंख्याक समाजाची लक्षणीय वस्ती आहे. रेड झोन क्षेत्रातील संभाव्य स्थलांतर आणि नजूल जमिनीवरील घरांच्या पट्ट्यांबाबत नागरिकांमध्ये संभ्रमाचे वातावरण आहे. भविष्यातील प्रशासकीय कारवाईमुळे आपल्या घरांवर परिणाम होऊ शकतो, अशी भीती काही कुटुंबांनी व्यक्त केली आहे.

शहरात अशी चर्चा आहे की विविध राजकीय पक्षांचे काही कार्यकर्ते अपुरी किंवा भ्रामक माहिती देऊन नागरिकांना गोंधळात टाकत आहेत. मात्र पाहणीदरम्यान असे कोणतेही व्यक्ती घटनास्थळी दिसून आले नाहीत. त्यामुळे अफवांवर विश्वास ठेवण्याऐवजी अधिकृत माहितीवर भरोसा ठेवणे आवश्यक असल्याचे स्पष्ट होत आहे.

स्थानिक नागरिक व जाणकारांचे मत आहे की नजूल जमिनीवरील घरांचे पट्टे, रेड झोनमधील संभाव्य स्थलांतर किंवा इतर प्रशासकीय विषयांबाबत संबंधित अधिकाऱ्यांशी थेट संपर्क साधून वस्तुनिष्ठ माहिती घेणे अधिक योग्य ठरेल. संवेदनशील अल्पसंख्याक भागांत पारदर्शकता व संवाद राखणे ही प्रशासन व लोकप्रतिनिधींची संयुक्त जबाबदारी आहे, जेणेकरून राजकारणापेक्षा नागरिकांच्या समस्यांना प्राधान्य देत त्यांचे समाधान करता येईल.