देऊळगाव राजा येथे मतदान यंत्राची सिलिंग प्रक्रिया पूर्ण 

चांदा ब्लास्ट प्रतिनिधी. प्रा. अशोक डोईफोडे

नगरपरिषद देऊळगाव राजा सार्वत्रिक निवडणूक 2025 अनुषंगाने मतदान प्रक्रिया पारदर्शक व निष्पक्ष राहावी यासाठी दिनांक 28 नोव्हेंबर रोजी मतदान यंत्रांची (EVM) सिलींग प्रक्रिया नियमांनुसार पार पडली

निवडणूक निर्णय अधिकारी श्री. सुरेश थोरात यांच्या मार्गदर्शनाखाली तसेच निवडणूक निरीक्षक श्री. जी. पी. साबळे, सहायक निवडणूक निर्णय अधिकारी श्रीमती सुप्रिया चव्हाण, अतिरिक्त सहायक निवडणूक निर्णय अधिकारी श्रीमती वैशाली डोंगरजाळं यांच्या उपस्थितीत नियंत्रण युनिट (CU) व बॅलेट युनिट (BU) यंत्रांची सविस्तर तपासणी करण्यात आली. यंत्रांची तांत्रिक पाहणी, कार्यपरीक्षण (Mock Test) आणि त्यानंतरची सिलींग प्रक्रिया विधिसम्मत नियमांनुसार पूर्ण करण्यात आली.

प्रत्येक प्रभागाकरिता आवश्यक यंत्रे तसेच राखीव यंत्रे स्वतंत्रपणे सुरक्षितरीत्या सीलबंद करण्यात आली. संपूर्ण प्रक्रिया सर्व उमेदवार व उमेदवार प्रतिनिधी यांच्या उपस्थितीत पूर्ण पारदर्शकतेने पार पडली.

देऊळगाव राजा नगरपरिषद निवडणूक 2025 मध्ये मतदारांना विश्वासार्ह, सुरक्षित व अचूक मतदान सुविधा उपलब्ध करून देण्यासाठी प्रशासन कटिबद्ध आहे.