नाली निर्माणासाठी अतिक्रमण हटविण्याची मोहिम सुरू, पण पक्षपाताचे आरोप!
चांदा ब्लास्ट
घुग्घुस, चंद्रपूर : घुग्घुस येथील केमिकल वॉर्डमध्ये नालीच्या बांधकामासाठी नगर परिषदेकडून अतिक्रमण हटविण्याची मोहिम सुरू करण्यात आली असून, हा एक अत्यंत स्वागतार्ह निर्णय आहे. स्थानिक नागरिकांनी या कारवाईचं कौतुक केलं असलं तरी नगर परिषदेच्या कार्यपद्धतीवर आणि निष्पक्षतेवर प्रश्नचिन्ह निर्माण झाले आहेत.
स्थानिक रहिवाशांचा आरोप आहे की काही नामांकित राजकीय नेत्यांच्या दबावाखाली येऊन, पावसाळ्यापूर्वी नाली सफाईसाठी काही लोकांनी केलेल्या अतिक्रमणांकडे – जसे की सिड्या, टिन शेड, दुकाने वगैरे – जाणीवपूर्वक दुर्लक्ष केले जात आहे. त्यामुळे प्रश्न उपस्थित होतो की, मुख्याधिकाऱ्यांचा त्यांच्या अधिकाऱ्यांवर नियंत्रण आहे की नाही? की हे सर्व मुद्दाम केले जात आहे?
अलीकडेच घुग्घुस काँग्रेस कमिटीचे अध्यक्ष आणि कार्यकर्त्यांनी नगर परिषदेच्या कार्यपद्धतीविरोधात आंदोलन केलं होतं. त्या आंदोलनानंतर काहीच दिवसांत अतिक्रमण हटविण्याची मोहिम सुरू झाल्यामुळे हे पाऊल स्वागतार्ह असलं तरी, त्यातील पक्षपातामुळे नगर परिषदेच्या हेतूंवर संशय निर्माण होत आहे.
या संदर्भात माजी उपसरपंच सुधाकर बांधुरकर यांनी तीव्र प्रतिक्रिया देताना सांगितले, “याला म्हणतात पक्षपात!” त्यांनी स्पष्टपणे आरोप केला की मार्केट लाईनमध्ये नालीवर असलेल्या चेंबरवरील अतिक्रमण बाबतीत नगर परिषद राजकीय दबावाखाली आली आणि कारवाई केली नाही. “नोटीस दिली जात असेल, तर त्याचा काही उपयोग तरी आहे का?” असा सवालही त्यांनी उपस्थित केला.
स्थानिक नागरिकांची मागणी आहे की अतिक्रमण हटविण्याची ही मोहिम पूर्णपणे निष्पक्ष असावी, जेणेकरून सर्व नागरिकांवर एकसारखी कार्यवाही होईल आणि शहराचा विकास कोणत्याही राजकीय हस्तक्षेपाशिवाय पार पडेल.
