घुग्घुस-वणी मार्गावर वाळू वाहतुकीवर कारवाई

चांदा ब्लास्ट

घुग्घुस-वणी मार्गावर अवैध वाळू वाहतुकीविरोधात प्रशासनाने मध्यरात्री जोरदार कारवाई केली आहे. (नायब तहसीलदार) डॉ. सचिन खंडाळे, (मंडळ अधिकारी, घुग्घुस) प्रकाश सुरवे, (तलाठी पिपरी) शाम खराटे आणि (तलाठी शेनगाव) यांच्या संयुक्त पथकाने मंगळवार व बुधवारच्या मध्यरात्री १२:३० ते १:३० दरम्यान ही कारवाई केली.

या कारवाईत तीन अवजड वाहने जप्त करून घुग्घुस पोलिस ठाण्यात जमा करण्यात आली आहेत. सूत्रांनी दिलेल्या माहितीनुसार, MH 29 BD 5400 क्रमांकाच्या वाहनामध्ये गडचिरोली जिल्ह्यातील अंबेशिवनी घाटाची ७ ब्रास रॉयल्टीची वाळू दाखवली होती, मात्र प्रत्यक्षात १२ ब्रास वाळू आढळली. दुसऱ्या दोन वाहनांमध्ये — MH 27 BX 7209 आणि MH 32 AJ 4442 — प्रत्येकी १० ब्रास वाळू होती, मात्र कोणतीही वैध रॉयल्टी उपलब्ध नव्हती.

मिळालेल्या माहितीनुसार, रॉयल्टी असलेले वाहन यवतमाळ जिल्ह्यातील आहे, तर उर्वरित दोन्ही वाहने यवतमाळ जिल्ह्यातील कडम तालुक्यातील मेतीखेडा गावाशी संबंधित आहेत.

या घटनेनंतर घुग्घुस परिसरात जोरदार चर्चा सुरू आहे. स्थानिक नागरिकांच्या मते, डॉ. खंडाळे आणि त्यांच्या टीमने फक्त दंड आकारून ही वाहने सोडून देतील की घाटमालक, वाहनचालक व मालकांविरुद्ध गुन्हा दाखल करून पुढील कायदेशीर कारवाई केली जाईल, हे पाहणे महत्त्वाचे ठरणार आहे.

या घटनेमुळे एक मोठा प्रश्न निर्माण झाला आहे — प्रशासनातील इतर अधिकारी व कर्मचारी अशा प्रकारच्या अवैध व्यापाराकडे जाणीवपूर्वक दुर्लक्ष करत आहेत का? यात कुठे तरी अंतर्गत संगनमत तर नाही ना? आता लक्ष लागून आहे की संबंधित यंत्रणा कितपत पारदर्शक व कठोर पवित्रा घेणार आहेत.