अखेर पालकमंत्र्यांच्या बैठकीनंतरच ते दारू दुकान स्थलांतरीत करण्याच्या सुचना

स्थानिक जगन्नाथ महाराज मठ परिसरातील रामसेतू पुलाच्या पायथ्याशी असलेले देशी दारू दुकान अखेर पालकमंत्र्यांच्या बैठकीनंतर स्थलांतरीत करण्याच्या सुचना जिल्हा प्रशासन व राज्य उत्पादन शुल्क विभागाला देण्यात आलेल्या आहेत. सदर दुकान स्थलांतरीत व्हावे, याकरीता माजी उपमहापौर राहुल पावडे यांच्या नेतृत्वात स्थानिक नागरिकांनी मोठे जनआंदोलन केले होते. जगन्नाथबाबा मठ व रामसेतू पुल या रहिवासी परिसरात नवीन देशी दारूभट्टीला परवानगी देण्यात आली आहे. या देशी दारू दुकानामुळे स्थानिक रहिवासी व रस्त्यावरून ये-जा करणाऱ्या नागरिकांना मोठा त्रास सहन करावा लागत आहे. याशिवाय या परिसरात धार्मिकस्थळ असल्याने परिसराचे पावित्र्य धोक्यात आले आहे. या देशी दारू दुकानाला येथून हटविण्याची जिल्हा प्रशासन व राज्य उत्पादन शुल्क विभागाकडे स्थानिक नागरिकांनी वारंवार मागणी केली. तसेच जगन्नाथबाबा नगरातील नागरिकांनी माजी उपमहापौर राहुल पावडे यांनी आक्रमक भूमिका घेत स्थानिक नागरिकांना सोबत घेवून आंदोलनही केले. दरम्यान लोकशाही मार्गाने निवेदने देवून पत्रव्यवहार व पाठपुरावा केला. देशी दारू दुकान या पवित्र ठिकाणाहून दुसऱ्या ठिकाणी स्थलांतर करण्याची मागणी सुरू असताना देशी दारू दुकान उघडण्याचा वारंवार प्रयत्न संबंधितांकडून  केला जात होता. याची माहिती मिळताच माजी उपमहापौर राहुल पावडे यांच्या सतरतेमुळे व राजकीय पाठबळा मुळेच वारंवार सुरू केलेली देशी दारू भट्टी अनेकदा त्यांनी बंद पाडली उत्पादन शुल्क विभाग कोणतीच कारवाई करण्यात समर्थपणा दाखवत नव्हते असे प्रकार सुरू असताना अखेर सदर देशी दारू दुकान जगन्नाथबाबा मठ परिसर ठिकाणाहून रद्द करण्याची मागणी जिल्ह्याचे पालकमंत्री नामदार सुधीर मुनगंटीवार यांच्याकडे करण्यात आली होती. या मागणीची दखल घेवूनच पालकमंत्री सुधीर मुनगंटीवार यांनी तातडीने नियोजन भवनात बैठक लावून राज्य उत्पादन शुल्क विभागाच्या अधिकाऱ्यांची चांगलीच कानउघाडणी केली. सदर देशी दारु दुकानाला या पवित्र ठिकाणाहून लवकरात लवकर स्थलांतरित करण्यात सूचना जिल्हाधिकारी व राज्य उत्पादन शुल्क अधिकाऱ्यांना  नियोजन भवनात झालेल्या बैठकीत करण्यात आल्या. त्यानंतर आता देशी दारु दुकान स्थलांतरीत करण्याची प्रक्रिया सुरू झाली आहे. त्यामुळे पालकमंत्री सुधीर मुनगंटीवार सूचनेमुळे  लवकरच यापरिसरातील नागरिकांची या समस्येतून सुटका होणारच आहे.