बुलढाण्यात जिल्हा सरसकट दुष्काळग्रस्त जाहीर करण्याची काँग्रेस पक्षाची मुख्यमंत्रीकडे मागणी

चांदा ब्लास्ट प्रतिनिधी. प्रा. अशोक डोईफोडे

बुलढाणा जिल्ह्यात अत्यल्प पावसामुळे शेतीपिकांचे मोठ्या प्रमाणात नुकसान झाल्याचा दावा करत, जिल्हा सरसकट दुष्काळग्रस्त जाहीर करण्याची मागणी भारतीय राष्ट्रीय काँग्रेसच्या देऊळगावराजा तालुका कमिटीने केली आहे. शेतकऱ्यांच्या पिकांचे तातडीने पंचनामे करून नुकसानभरपाई देण्यात यावी, तसेच पीकविमा मंजूर करावा, अशी मागणी तालुका काँग्रेस अध्यक्ष रामदास तातेबा डोईफोडे यांनी मुख्यमंत्री देवेंद्र फडणवीस यांना दिलेल्या निवेदनातून केली आहे.
पिकांचे मोठ्या प्रमाणात नुकसान झाल्याचा दावा
काँग्रेसच्या निवेदनानुसार, बुलढाणा जिल्ह्यात अत्यल्प प्रमाणात पाऊस पडल्याने शेतकऱ्यांच्या खरीप पिकांना मोठा फटका बसला आहे. सोयाबीन, कापूस, तूर, मका आणि भाजीपाला या पिकांचे ७० ते ७५ टक्के नुकसान झाल्याचा दावा निवेदनात करण्यात आला आहे. काही ठिकाणी पिके ९० ते ९५ टक्क्यांपर्यंत करपून निकामी झाल्याचेही निवेदनात नमूद करण्यात आले आहे. पावसाचे प्रमाण वाढले तरी नुकसान झालेली पिके पूर्ववत होण्याची शक्यता कमी असल्याचे काँग्रेसने म्हटले आहे. त्यामुळे शेतकऱ्यांच्या आर्थिक अडचणी वाढल्या असून, शासनाने तातडीने हस्तक्षेप करण्याची आवश्यकता असल्याचे निवेदनातून अधोरेखित करण्यात आले आहे.
पंचनाम्यांना विलंब नको; तातडीने मदतीची मागणी
शेतकऱ्यांचे नुकसान केवळ कागदोपत्री नोंदवून न थांबता, प्रत्यक्ष पंचनामे करून मदत वितरित करावी, अशी भूमिका काँग्रेसने मांडली आहे. बुलढाणा जिल्हा सरसकट दुष्काळग्रस्त घोषित करून नुकसानग्रस्त शेतकऱ्यांना तातडीने १ लाख रुपये नुकसानभरपाई देण्यात यावी, अशी मागणी निवेदनात करण्यात आली आहे.
शासनाच्या मदतीअभावी शेतकऱ्यांवर आर्थिक संकट अधिक गडद होऊ शकते, असा मुद्दा उपस्थित करत काँग्रेसने प्रशासनाने विलंब न करता कार्यवाही करावी, अशी मागणी केली आहे.
पीकविमा मंजुरीसाठीही पाठपुरावा
नुकसानग्रस्त शेतकऱ्यांना पीकविम्याचा लाभ तातडीने मिळावा, यासाठीही काँग्रेसने शासनाकडे मागणी केली आहे. पिकांचे नुकसान झालेल्या शेतकऱ्यांना विमा संरक्षणाचा लाभ मिळण्यासाठी आवश्यक प्रक्रिया जलदगतीने पूर्ण करावी, अशी मागणी निवेदनातून करण्यात आली आहे.

आमदारांकडेही हस्तक्षेपाची मागणी केली आहे,
या निवेदनाची प्रत सिंदखेड राजा मतदारसंघाचे आमदार मनोजभाऊ कायंदे आणि देऊळगावराजा तहसीलदार यांना देण्यात आली आहे. मतदारसंघातील शेतकऱ्यांच्या हितासाठी आमदारांनी या प्रकरणात वैयक्तिक लक्ष घालून शासन स्तरावर पाठपुरावा करावा, अशी विनंती काँग्रेसने केली आहे.
शेतकऱ्यांच्या नुकसानीची दखल घेऊन शासनाने तातडीने निर्णय घ्यावा, पंचनामे पूर्ण करावेत आणि नुकसानभरपाई व पीकविम्याबाबत ठोस कार्यवाही करावी, अशी मागणी या निवेदनातून करण्यात आली आहे.
काँग्रेस पदाधिकारी व कार्यकर्त्यांच्या स्वाक्षऱ्या आहे.

या निवेदनावर तालुका काँग्रेस अध्यक्ष रामदास डोईफोडे, शहर अध्यक्ष अतिशभाऊ कासारे, ज्येष्ठ नेते रमेशदादा कायंदे, अनिल सावजी, हनीफभाई शाह, यश कासारे, बाबासाहेब कोल्हे, राजाराम कोल्हे, मतीनभाई चाऊस, राजाराम खंडेभराड, रवींद्र इंगळे, इनायत खा हाजी खा, मुबारकभाई चंद्रभान झीने, अभय मघाडे, धोंडीराम लंके, पियुष कासारे, आकाश कासारे, भानू तिडके, धोंडीराम ढगे यांच्यासह इतरांच्या स्वाक्षऱ्या असल्याचे नमूद करण्यात आले आहे.

शेतकऱ्यांना तातडीची मदत, पिकविम्याची मंजुरी आणि दुष्काळ जाहीर करण्याच्या मागणीवर आता शासन काय निर्णय घेते, याकडे शेतकरी व नागरिकांचे लक्ष लागले आहे..