RCERTमध्ये गणेशोत्सवाच्या पार्श्वभूमीवर रक्तदान शिबिर

चांदा ब्लास्ट

चंद्रपूर :_ सरदार पटेल मेमोरियल सोसायटी (ट्रस्ट) संचालित राजीव गांधी कॉलेज ऑफ इंजिनिअरिंग, रिसर्च अँड टेक्नॉलॉजी (RCERT), चंद्रपूर येथे महाविद्यालयाच्या गणेशोत्सव समितीच्या वतीने १४ ते १८ सप्टेंबर २०२६ या कालावधीत गणेशोत्सवाचे आयोजन करण्यात आले आहे. पारंपरिक भारतीय संस्कृती आणि आधुनिक शैक्षणिक वातावरण यांचा सुंदर संगम साधत महाविद्यालय परिसरात गणेशोत्सवाची आकर्षक सजावट करण्यात आली आहे. गणेशोत्सवाच्या या उत्सवी वातावरणात विविध सामाजिक व विद्यार्थीहिताचे उपक्रमही राबविण्यात येत आहेत.

याच गणेशोत्सवाच्या कालावधीत कमलादेवी दीक्षित चॅरिटेबल ट्रस्ट यांच्या पुढाकाराने रक्तदान शिबिराचे आयोजन करण्यात आले. ‘Give Blood, Give Hope, Together We Save Lives’ या मानवतावादी संदेशातून आयोजित करण्यात आलेल्या या शिबिराला महाविद्यालयातील विद्यार्थी आणि प्राध्यापकांचा उत्स्फूर्त प्रतिसाद मिळाला. सण-उत्सवाच्या आनंदासोबतच सामाजिक बांधिलकी जपत प्राध्यापकांसह सुमारे ५० विद्यार्थ्यांनी रक्तदान केले.

यावेळी सरदार पटेल मेमोरियल सोसायटीचे अध्यक्ष विनोद दत्तात्रेय तसेच महाविद्यालयाचे प्राचार्य डॉ. अनिल चिताडे यांची उपस्थिती होती. त्यांनी रक्तदान करणाऱ्या विद्यार्थ्यांचे व प्राध्यापकांचे कौतुक करून सामाजिक उपक्रमांमध्ये विद्यार्थ्यांनी सक्रिय सहभाग घेण्याचे आवाहन केले.

रक्तदान शिबिरासाठी डॉ. हेडगेवार ब्लड सेंटर, नागपूर यांचे सहकार्य लाभले. गरजू रुग्णांना वेळेवर रक्त उपलब्ध व्हावे तसेच तरुणांमध्ये रक्तदानाविषयी जनजागृती निर्माण व्हावी, या उद्देशाने शिबिराचे आयोजन करण्यात आले होते. विद्यार्थ्यांनी उत्स्फूर्तपणे पुढाकार घेत रक्तदान करून ‘रक्तदान हेच जीवनदान’ या संदेशाला कृतीतून अधोरेखित केले.

गणेशोत्सवाच्या निमित्ताने महाविद्यालयात पारंपरिक धार्मिक वातावरणासोबतच सामाजिक जाणीव आणि मानवतेचा संदेश देणारे उपक्रम राबविण्यात येत आहेत. गणेशोत्सव समितीने आकर्षक सजावट, सांस्कृतिक उपक्रम आणि सामाजिक उपक्रमांच्या माध्यमातून विद्यार्थ्यांना भारतीय संस्कृतीशी जोडण्याबरोबरच समाजाप्रती असलेली जबाबदारी समजून घेण्याची संधी उपलब्ध करून दिली आहे.

या रक्तदान शिबिराच्या यशस्वी आयोजनासाठी डॉ. धनंजय डुंबेरे, डॉ. अमित आक्केवार, डॉ. नितीन जानवे, प्रा. आनंद डोनाल्ड, डॉ. माधवी साडू, प्रा. महेश डुंबेरे, प्रा. निखिल दुबे, प्रा. आदित्य आंबटकर आणि रूपक कामडी यांनी विशेष परिश्रम घेतले.

गणेशोत्सवाच्या उत्साहात रक्तदानासारख्या सामाजिक उपक्रमाला मिळालेला प्रतिसाद महाविद्यालयातील विद्यार्थ्यांमध्ये वाढत असलेल्या सामाजिक जाणीवेचे उदाहरण ठरले. रक्तदान करणाऱ्या सर्व विद्यार्थी व प्राध्यापकांचे आयोजकांच्या वतीने आभार मानण्यात आले. भविष्यातही विद्यार्थ्यांच्या सर्वांगीण विकासासोबतच सामाजिक बांधिलकी जपणाऱ्या विविध उपक्रमांना प्रोत्साहन देण्याचा निर्धार यावेळी व्यक्त करण्यात आला.