कनिष्ठ लिपिकाने केली 35 लाखांची अफरातफर

चांदा ब्लास्ट प्रतिनिधी. अतुल कोल्हे

              भद्रावती ग्रामीण रुग्णालयातील एका कनिष्ठ लिपिकाने बनावट स्वाक्षऱ्या व बनावट स्टॅम्प च्या साह्याने तब्बल 35 लक्ष रुपयांची अफरातफर केल्याचे प्रकरण उघडकीस आले आहे. वैद्यकीय अधीक्षकांनी केलेल्या तक्रारीवरून भद्रावती पोलिसांनी आरोपीवर विविध गुन्हे दाखल करून त्याला अटक केली आहे. अतुल गणेश सारसर असे या अटक करण्यात आलेल्या आरोपीचे नाव आहे.

सदर कनिष्ठ लिपिक असलेल्या आरोपी अतुल सारसर याच्याकडे भद्रावती ग्रामीण रुग्णालयाचा आर्थिक कार्यभार होता. गेल्या तीन ते चार वर्षांपासून त्याने वैद्यकीय अधीक्षकाच्या खोट्या स्वाक्षऱ्या करून व खोटे स्टॅम्प, पावत्या बनवून आजपर्यंत जवळपास 35 लाख रुपये आपल्या खात्यात हस्तांतरित केले. ही बाब उघडकीस आल्यानंतर वैद्यकीय अधिकारी मनीष सिंग यांनी या प्रकरणाची तक्रार वरिष्ठांकडे केली. त्यानुसार वरिष्ठ अधिकाऱ्यांकडून याबाबत एक समिती गठीत करून या प्रकरणाची आधी प्राथमिक चौकशी करण्यात आली.

या चौकशीत सदर आरोपी दोषी आढळल्यानंतर वरिष्ठांच्या सूचनेनुसार सदर आरोपी विरुद्ध भद्रावती पोलिसात तक्रार दाखल करण्यात आली. या तक्रारीनुसार आरोपी अतुल सारसर याला अटक करण्यात आली. सदर प्रकरणाचा पुढील तपास भद्रावती पोलीस करीत आहे.