भद्रावतीत ७० वा धम्मचक्र प्रवर्तन दिन उत्साहात : भव्य धम्म शोभायात्रेला उत्स्फूर्त प्रतिसाद

चांदा ब्लास्ट प्रतिनिधी. अतुल कोल्हे

           भारतीय राज्यघटनेचे शिल्पकार, महामानव डॉ. बाबासाहेब आंबेडकर यांनी १४ ऑक्टोबर १९५६ रोजी नागपूर येथे लाखो अनुयायांसह बौद्ध धम्माची दीक्षा घेऊन देशाला समता, स्वातंत्र्य, बंधुता आणि मानवतेचा संदेश दिला. या ऐतिहासिक धम्मक्रांतीच्या ७० व्या वर्धापनदिनानिमित्त भद्रावती येथे धम्मचक्र अनुवर्तन दिन सोहळा समितीच्या वतीने बुधवार, दि. १४ ऑक्टोबर २०२६ रोजी भव्य धम्म शोभायात्रेचे आयोजन करण्यात आले. हा सोहळा उत्साहपूर्ण वातावरणात संपन्न झाला.

शोभायात्रेचा प्रारंभ डॉ. बाबासाहेब आंबेडकर यांच्या पुतळ्याजवळून करण्यात आला. तेथून ही भव्य धम्म शोभायात्रा स्वर्गीय बाळासाहेब ठाकरे प्रवेशद्वारापर्यंत नेण्यात आली. त्यानंतर तेथून परत डॉ. बाबासाहेब आंबेडकर चौकापर्यंत शोभायात्रा काढण्यात आली. या शोभायात्रेत धम्मप्रेमी नागरिक, युवक, महिला आणि विविध सामाजिक कार्यकर्त्यांनी उत्स्फूर्त सहभाग नोंदविला.

यावेळी महामानव डॉ. बाबासाहेब आंबेडकर यांच्या पुतळ्याला माल्यार्पण, पंचशील ध्वजारोहण, दीपप्रज्वलन आणि स्वागत समारंभ आदी कार्यक्रमांचे आयोजन करण्यात आले. भगवान गौतम बुद्धांचा शांती, करुणा, मैत्री आणि प्रज्ञेचा संदेश या सोहळ्यातून देण्यात आला.

डॉ. बाबासाहेब आंबेडकर यांनी सामाजिक विषमता आणि जातिभेदाविरुद्ध संघर्ष करून वंचित, शोषित आणि पीडित समाजाला स्वाभिमानाने जगण्याचा मार्ग दाखविला. त्यांच्या विचारांचा वारसा पुढे नेण्यासाठी आणि बौद्ध धम्माची मूल्ये समाजात रुजविण्यासाठी अशा कार्यक्रमांचे महत्त्व अधोरेखित करण्यात आले.

या सोहळ्याच्या आयोजनात मुख्य समिती, युवा कार्यकारिणी आणि महिला समितीच्या पदाधिकाऱ्यांसह विविध सामाजिक कार्यकर्ते व समाजबांधवांनी सहकार्य केले. मुख्य आयोजकांमध्ये डॉ. अमित नगराळे, अनमोल कोल्हटकर, नितीन देवगडे, विशाल बोरकर, उज्ज्वल रामटेके, सर्वेश चहांदे, राहुल सोनटक्के, सोनल कोल्हटकर, सुनील धाबर्डे आणि सागर कोल्हटकर यांचा समावेश होता.

तसेच विविध सामाजिक कार्यकर्ते, युवक, महिला पदाधिकारी आणि धम्मप्रेमी नागरिकांच्या सहभागामुळे कार्यक्रमाला सामाजिक एकतेचे स्वरूप प्राप्त झाले. धम्मचक्र अनुवर्तन दिनाच्या निमित्ताने डॉ. बाबासाहेब आंबेडकर यांच्या समतावादी विचारांचे स्मरण करण्यात आले.

भगवान गौतम बुद्ध आणि महामानव डॉ. बाबासाहेब आंबेडकर यांच्या विचारांनुसार समता, बंधुता, न्याय आणि मानवतेची मूल्ये जपण्याचा संदेश या सोहळ्यातून देण्यात आला.