नाकाबंदी दरम्यान गोंडपिपरी पोलिसांची मोठी कारवाई

चांदा ब्लास्ट प्रतिनिधी. राजेश डोंगरे

चंद्रपूर जिल्ह्यातील अवैध दारू विक्री व वाहतुकीला आळा घालण्यासाठी सुरू असलेल्या विशेष मोहिमेअंतर्गत गोंडपिपरी पोलिसांनी नाकाबंदी दरम्यान मोठी कारवाई करत चारचाकी वाहनातून देशी-विदेशी दारूचा साठा जप्त केला असून, या प्रकरणात एका आरोपीला ताब्यात घेण्यात आले आहे. या कारवाईत दारूसाठ्यासह चारचाकी वाहन असा लाखो रुपयांचा मुद्देमाल जप्त करण्यात आला आहे.

चंद्रपूर जिल्ह्यातील अवैध दारू, जुगार व इतर बेकायदेशीर व्यवसायांवर प्रभावी कारवाई करण्याचे निर्देश वरिष्ठ पोलिस अधिकाऱ्यांनी दिले आहेत. त्यानुसार गोंडपिपरी पोलिस ठाण्याच्या हद्दीत सातत्याने विशेष मोहीम राबविण्यात येत आहे.

प्राप्त माहितीनुसार, दि. ५ सप्टेंबर रोजी सायंकाळच्या सुमारास गोंडपिपरी पोलिसांना गोपनीय माहिती मिळाली की, एक चारचाकी वाहनातून मोठ्या प्रमाणात देशी-विदेशी दारूची अवैधरित्या वाहतूक करण्यात येत आहे. या माहितीच्या आधारे पोलिसांनी तातडीने सापळा रचून नाकाबंदी केली.

नाकाबंदी दरम्यान संशयित मारुती सुझुकी डिझायर कार पोलिसांच्या नजरेस पडली. पोलिसांनी वाहन थांबविण्याचा प्रयत्न केला असता चालकाने वाहन पळविण्याचा प्रयत्न केल्याची माहिती आहे. मात्र पोलिसांनी तत्परता दाखवत वाहनाचा पाठलाग करून ते ताब्यात घेतले.

वाहनाची तपासणी केली असता त्यामध्ये विविध कंपन्यांची देशी व विदेशी दारू आढळून आली. यात देशी दारूच्या बाटल्या, विदेशी दारू तसेच बिअरचा साठा असल्याचे निष्पन्न झाले. पोलिसांनी दारूसाठा आणि वाहतुकीसाठी वापरण्यात आलेले चारचाकी वाहन असा मोठ्या किमतीचा मुद्देमाल जप्त केला.

या प्रकरणी संदेश शंभू रामटेके (वय २३ वर्षे, व्यवसाय चालक, रा. इंदिरानगर, मूल रोड, चंद्रपूर) याच्याविरुद्ध महाराष्ट्र दारूबंदी अधिनियमांतर्गत गुन्हा दाखल करून त्याला ताब्यात घेण्यात आले आहे.

ही कारवाई पोलिस स्टेशन गोंडपिपरीच्या पथकाने वरिष्ठ अधिकाऱ्यांच्या मार्गदर्शनाखाली केली. गोंडपिपरी पोलिसांच्या या धडक कारवाईमुळे अवैध दारू व्यवसाय करणाऱ्यांमध्ये खळबळ उडाली असून, अवैध दारू विक्री व वाहतुकीविरोधात पुढील काळातही कठोर कारवाई सुरू राहणार असल्याचा इशारा पोलिस विभागाने दिला आहे.

*अवैध व्यवसायिकांना पोलिसांचा इशारा*

गोंडपिपरी पोलिसांच्या प्रभावी कारवाईमुळे अवैध दारूची वाहतूक करणाऱ्या तस्करांना चांगलाच दणका बसला आहे. परिसरात अवैध दारू विक्री अथवा वाहतुकीची माहिती नागरिकांनी पोलिसांना द्यावी, असे आवाहनही करण्यात आले आहे.