‘एक झाड – एक जबाबदारी’; ब्रम्हपुरी पोलीस वसाहतीमध्ये वृक्षारोपण संपन्न

चांदा ब्लास्ट प्रतिनिधी. नंदू गुद्देवार

ब्रम्हपुरी :- वाढत्या प्रदूषणावर मात करण्यासाठी आणि पोलीस वसाहतीचा परिसर निसर्गरम्य व सुंदर बनवण्यासाठी ब्रम्हपुरी येथे एका विशेष वृक्षारोपण कार्यक्रमाचे आयोजन करण्यात आले होते. ‘झाडे लावा, झाडे जगवा’ हा संदेश प्रत्यक्ष कृतीत आणत पोलीस वसाहतीमध्ये पर्यावरण संवर्धन आणि हरित भविष्याचा जागर करण्यात आला. हा पर्यावरणपूरक उपक्रम चंद्रपूरचे पोलीस अधीक्षक आयुष नोपानी यांच्या मुख्य दिशानिर्देशनाखाली आणि ब्रम्हपुरीचे पोलीस निरीक्षक प्रमोद बानबले यांच्या मार्गदर्शनाखाली अत्यंत उत्साहात पार पडला.

        या उपक्रमाचे मुख्य वैशिष्ट्य म्हणजे केवळ झाडे लावून न थांबता, “एक झाड – एक जबाबदारी” ही संकल्पना राबविण्यात आली. पोलीस वसाहतीमधील प्रत्येकाने लावलेल्या रोपाचे पूर्णपणे संगोपन आणि जतन करण्याचा दृढ संकल्प यावेळी केला. यामुळे केवळ औपचारिकता न ठरता, हा परिसर भविष्यात खऱ्या अर्थाने हरित नंदनवन बनेल, असा विश्वास यावेळी व्यक्त करण्यात आला.

          या वृक्षारोपण सोहळ्याप्रसंगी पोलीस विभागातील कर्मचारी आणि स्थानिक नागरिकांनी उत्स्फूर्त सहभाग नोंदवला. यावेळी पोलीस कर्मचारी सर्वश्री गोपीचंद कुमरे, पुरुषोत्तम भरडे, देविदास रणदिवे, धनपाल निहाटे, मोहसिन खान, महिला पोलीस कर्मचारी रिना धुर्वे तसेच सैनिक भास्कर मेश्राम उपस्थित होते.

यासोबतच सामाजिक जाणीवेतून ॲड. आशिष गोंडाने आणि सुशांत बनकर यांनीही या कार्यक्रमाला प्रामुख्याने उपस्थित राहून वृक्षारोपणात हातभार लावला. पोलीस खात्यात चोवीस तास कर्तव्य बजावतानाही निसर्गाप्रती असलेले आपले सामाजिक उत्तरदायित्व जपण्यासाठी ब्रम्हपुरी पोलिसांनी उचललेले हे पाऊल अत्यंत कौतुकास्पद ठरत असून, वसाहतीमधील नागरिकांनी या उपक्रमाचे स्वागत केले आहे.