देऊळगाव राजात १४ वर्षीय मुलाचा मृत्यू; ग्रामीण रुग्णालयात मृतावस्थेत आणले, पोलिसांत आकस्मिक मृत्यूची नोंद

चांदा ब्लास्ट प्रतिनिधी. प्रा. अशोक डोईफोडे

देऊळगाव राजा : तालुक्यातील पांगरी येथील ओम अशोक वाघ (वय १४) या अल्पवयीन मुलाला ११ ऑक्टोबर रोजी सायंकाळी देऊळगाव राजा येथील ग्रामीण रुग्णालयात मृतावस्थेत आणण्यात आल्याची घटना समोर आली आहे. या प्रकरणी देऊळगाव राजा पोलिसांनी आकस्मिक मृत्यूची नोंद केली असून, मृत्यूचे नेमके कारण स्पष्ट झालेले नाही.

पोलिसांकडून मिळालेल्या माहितीनुसार, ग्रामीण रुग्णालयाचे वैद्यकीय अधिकारी डॉ. सुभाष दराडे यांच्या वतीने कक्षसेवक प्रवीण सुभाष खरात (वय ३०, रा. बोरखेडी बावरा, ता. देऊळगाव राजा) यांनी ११ ऑक्टोबर रोजी वैद्यकीय-न्यायवैद्यक प्रकरणासंदर्भातील (एमएलसी) लेखी मेमो देऊळगाव राजा पोलीस ठाण्यात सादर केला.

या मेमोमध्ये ओम अशोक वाघ याला सायंकाळी ५ वाजताच्या सुमारास सुभाष वाघ यांनी ग्रामीण रुग्णालयात आणले असता तो मृतावस्थेत असल्याचे नमूद करण्यात आले आहे. या माहितीच्या आधारे पोलिसांनी कायम मर्ग क्रमांक ४५/२०२६ अन्वये भारतीय नागरिक सुरक्षा संहिता (बीएनएसएस) कलम १९४ अंतर्गत आकस्मिक मृत्यूची नोंद केली.

या प्रकरणाचा तपास पोलीस निरीक्षकांच्या आदेशानुसार पोलीस हेडकॉन्स्टेबल माधव कुटे यांच्याकडे सोपविण्यात आला आहे. प्राथमिक तपास पोलीस उपनिरीक्षक मांटे यांच्याकडे देण्यात आला होता.

मृत्यूचे कारण अद्याप स्पष्ट नाही

ओम वाघ याचा मृत्यू नेमका कोणत्या कारणामुळे झाला, याबाबत उपलब्ध पोलिस नोंदीत स्पष्ट माहिती नाही. त्यामुळे मृत्यूचे कारण आणि घटनेशी संबंधित अन्य बाबी तपासातून स्पष्ट होण्याची शक्यता आहे.

या घटनेमुळे पांगरी परिसरात हळहळ व्यक्त होत असून, पोलिसांच्या तपासानंतरच मृत्यूमागील नेमके कारण स्पष्ट होईल..