‘हर हर महादेव’च्या जयघोषात देऊळगाव राजा नगरी दुमदुमली

चांदा ब्लास्ट प्रतिनिधी. प्रा. अशोक डोईफोडे

देऊळगाव राजा शहरात ‘भोले शिव शंभो’चा गजर; डीजेच्या तालावर भक्तांचा उत्साह, ठिकठिकाणी महाप्रसाद वाटप!

श्रावण महिन्यातील पवित्र पर्वाचे औचित्य साधून दरवर्षीप्रमाणे यावर्षीही देऊळगाव राजा शहरात दिनांक 24 ऑगस्ट रोजी शिवभक्तांच्या वतीने भव्य कावड यात्रेचे अत्यंत उत्साहात आयोजन करण्यात आले होते. ‘भोले शिव शंभो’ आणि ‘महाकाल हर हर महादेव’च्या जयघोषाने आणि डीजेच्या तालावर अवघे शहर शिवभक्तीच्या रंगात न्हाऊन निघाले होते. या अभूतपूर्व सोहळ्यात हजारो महादेव भक्त, महिला आणि परिसरातील गावांमधील नागरिक मोठ्या संख्येने सहभागी झाले होते.

भक्तिमय वातावरणात मिरवणुकीला सुरुवात

श्रावण महिन्यातील परंपरेनुसार सालाबादप्रमाणे आयोजित या कावड यात्रेला शहरातून भव्य मिरवणुकीने सुरुवात झाली. हातात कावड आणि डोक्यावर कलश घेतलेले हजारो शिवभक्त या यात्रेचे मुख्य आकर्षण होते. डीजेच्या सुरांवर आणि पारंपरिक वाद्यांच्या तालावर नाचणारे तरुण, महिला आणि बालकांमुळे संपूर्ण शहरात एक वेगळेच चैतन्य आणि भक्तीचे वातावरण निर्माण झाले होते.

*ठिकठिकाणी फराळ व महाप्रसाद वाटप*

कावड यात्रेच्या स्वागतासाठी आणि भक्तांच्या सुविधेसाठी शहरातील मुख्य चौकाचौकात विविध मंडळ व सामाजिक संस्थांच्या वतीने नाश्ता, पाणी आणि फराळाची उत्तम सोय करण्यात आली होती.

यामध्ये मुख्यत्वे:

दुर्गापुरा मित्र मंडळ: यांच्या वतीने भाविकांसाठी चवदार साबुदाणा खिचडीचे वाटप करण्यात आले.

चौंडेश्वरी मंदिर परिवार- यांच्या वतीने यात्रेत सहभागी भक्तांना केळी (फळ) वाटप करण्यात आले.

याशिवाय शहरात ठिकठिकाणी फळ वाटप, थंड पाणी आणि चहा-पाण्याची व्यवस्था करण्यात आली होती, ज्यामुळे भक्तांना मोठा दिलासा मिळाला.

*परिसरातील भाविकांची मोठी गर्दी*

ही कावड यात्रा केवळ देऊळगाव राजा शहरापुरती मर्यादित न राहता, आसपासच्या ग्रामीण भागातील नागरिकांसाठीही श्रद्धेचे केंद्र बनली आहे. यात्रेचे दर्शन घेण्यासाठी आणि या भक्तिमय सोहळ्याचे साक्षीदार होण्यासाठी ग्रामीण भागातील महिला व नागरिकांनी शहरात मोठी गर्दी केली होती. संपूर्ण देऊळगाव राजा शहरात एकतेचे, भक्तीचे आणि अपार श्रद्धेचे वातावरण या कावड यात्रेच्या निमित्ताने पाहायला मिळाले.

पोलीस प्रशासन चा कडक नियोजन बंदोबस्त पाहायला मिळाला.