भद्रावती परिसरात आणखी दोन उद्योग येणार : मुख्यमंत्री फडणवीस

चांदा ब्लास्ट प्रतिनिधी. अतुल कोल्हे

           भद्रावती शहरालगत एरा व ग्रेटा हे दोन प्रकल्प आधीच आलेले आहेत. याशिवाय अन्य दोन उद्योगांशी बोलणी चालू असून लवकरच हे दोन्ही ऊद्योग भद्रावती परिसरातच येईल यामुळे भद्रावती तथा वरोरा परिसराचा कायापालट होऊन बेरोजगारांच्या हाताला काम मिळेल, याशिवाय नगर परिषदेच्या माध्यमातून लाडक्या बहिणींना लखपती दीदी बनविण्याचे कार्य सुरू केल्या जाईल यासाठी भद्रावती व वरोरा नगर परिषदेच्या निवडणुकीत नगराध्यक्षांसह भारतीय जनता पक्षाचे सर्व उमेदवार निवडून आणा असे आवाहन मुख्यमंत्री देवेंद्र फडणवीस यांनी केले. भद्रावती व वरोरा नगर परिषदेच्या निवडणुकीत भाजप तर्फे भाजप उमेदवारांच्या प्रचारार्थ येथील शिंदे महाविद्यालयाच्या मैदानावर मुख्यमंत्री देवेंद्र फडणवीस यांच्या जाहीर सभेचे आयोजन करण्यात आले होते. त्यात ते बोलत होते.

यावेळी व्यासपीठावर मुख्यमंत्री देवेंद्र फडणवीस, ओबीसी आयोगाचे अध्यक्ष हंसराज अहिर, आ. करण देवतळे, डॉ. अशोक जीवतोडे, विजय राऊत, रवींद्र शिंदे, चंद्रकांत गुंडावार, रमेश राजुरकर, भद्रावती नगराध्यक्ष पदाचे उमेदवार अनिल धानोरकर, वरोरा नगराध्यक्ष पदाच्या उमेदवार माया राजुरकर आदी मान्यवर उपस्थित होते. येथील निप्पाण प्रकल्पग्रस्तांच्या समस्या अद्यापही कायम आहे. येत्या हिवाळी अधिवेशनात यावर चर्चा करून त्या मार्गी लावल्या जाईल असेही मुख्यमंत्री फडणवीस यांनी यावेळी सांगितले. याशिवाय पाच लाखापर्यंत वैद्यकीय सेवांच्या योजनेत आता 2400 आजारांचा समावेश केल्याने त्याचा फायदा नागरिकांना होणार असल्याचेही त्यांनी यावेळी सांगितले.

नगर परिषदेच्या माध्यमातून भद्रावती व वरोरा शहराचा विकास करण्यास शासन सदैव कटिबद्ध असेल असे आश्वासनही त्यांनी यावेळी दिले.सदर सभेला शहरातील नागरीक मोठ्या संख्येनी उपस्थित होते.