छत्रपति शिवाजी महाराज चौक येथे स्मारकाची मागणी

चांदा ब्लास्ट

चंद्रपूर : घुग्घुस MIDC परिसरातील छत्रपति शिवाजी महाराज चौकात त्यांच्या स्मारकाच्या उभारणीसाठी स्थानिक नागरिकांनी लॉयड्स मेटल घुग्घुस या कंपनीकडे जमीन मागितली होती. या संदर्भात ३० जानेवारी २०२५ रोजी चंद्रपूर विधानसभा क्षेत्राचे आमदार किशोर जोरगेवार चौकात उपस्थित होते. आमदारांच्या आगमनापूर्वीच शिवप्रेमी आणि स्थानिक नागरिक मोठ्या संख्येने तिथे जमले होते.

आमदार किशोर जोरगेवार यांनी स्मारकासाठी अनुदान देण्याचे आश्वासन दिले. यावेळी कंपनी प्रशासनातील अधिकारी, पोलीस आणि इतर मान्यवरही उपस्थित होते. मात्र, त्याच संध्याकाळी घुग्घुस पोलीस ठाण्याचे ठाणेदार यांनी शिवप्रेमी अभियंता चेतन देवराव बोबडे यांना नोटीस बजावली.

नोटीसवरून वाद आणि सोशल मीडियावर संताप?

नोटीसनुसार, ज्या जमिनीवर शिवाजी महाराज स्मारकाच्या उभारणीची मागणी होत होती, ती जमीन लॉयड्स मेटल अँड एनर्जी लिमिटेडच्या मालकीची आहे. कंपनी प्रशासनाने तिथे आधीच एका मंदिराच्या उभारणीसाठी भूमिपूजन केले असून, बांधकाम सुरू झाले आहे.

पोलीस प्रशासनाने स्पष्ट केले की, कोणीही या बांधकामात अडथळा आणल्यास किंवा तिथे झेंडे लावण्यासारख्या कृती केल्यास, महाराष्ट्र पोलीस अधिनियम १९५१ च्या कलम ३७ (१) (३) अंतर्गत कारवाई केली जाईल.

सध्या ही नोटीस सोशल मीडियावर जोरदार व्हायरल होत आहे. अनेक लोक प्रश्‍न उपस्थित करत आहेत की, पोलीस प्रशासन नागरिकांच्या बाजूने आहे की कंपनीच्या?

या घटनेमुळे घुग्घुस परिसरात नवीन वाद उभा राहिला आहे. आता स्थानिक प्रशासन यावर काय निर्णय घेते आणि नागरिकांच्या मागणीवर काय भूमिका घेतली जाते, हे पाहणे महत्त्वाचे ठरेल.