WCL च्या ओव्हर बर्डन मातीच्या अवैध उत्खनन व वाहतुकीमुळे महसूल विभागाचे मोठे नुकसान

चांदा ब्लास्ट

घुग्घुस (चंद्रपूर) : वेस्टर्न कोलफिल्ड् लिमिटेड (WCL) कडून खोदण्यात आलेल्या ओव्हर बर्डन (OB) मातीचे मोठ्या प्रमाणावर अवैध उत्खनन व वाहतूक सुरू आहे. या बेकायदेशीर व्यवहारामुळे शासनाच्या तिजोरीत जाणारी रोयल्टी बुडत आहे आणि महसूल विभागाला दररोज हजारो रुपयांचा तोटा सहन करावा लागत आहे. या गंभीर प्रकरणाकडे संबंधित अधिकाऱ्यांचे दुर्लक्ष होत असल्यामुळे अनेक प्रश्न निर्माण झाले आहेत.

प्रशासनाचे दुर्लक्ष की मिलीभगत?

हे संपूर्ण अवैध उत्खनन आणि वाहतूक नायब तहसील कार्यालय व घुग्घुस पोलिस ठाण्याच्या समोरून होत आहे, त्यामुळे प्रशासनाची भूमिका संशयास्पद वाटते. एवढ्या मोठ्या प्रमाणावर सुरू असलेली बेकायदेशीर वाहतूक प्रशासनाच्या माहितीशिवाय शक्य आहे का? असा प्रश्न नागरिक उपस्थित करत आहेत. जर यावर त्वरित नियंत्रण मिळवले नाही, तर शासनाला मोठ्या प्रमाणावर आर्थिक नुकसान सहन करावे लागेल.

शासनाचे मोठे आर्थिक नुकसान

या अवैध उत्खननामुळे शासनाच्या महसूल विभागाला मोठे नुकसान सहन करावे लागत आहे. रोयल्टीच्या स्वरूपात शासनाला मिळणारा महसूल थेट कमी होत आहे. जाणकारांच्या मते, जर लवकरात लवकर कठोर कारवाई झाली नाही, तर हा प्रकार अधिक मोठ्या प्रमाणावर होऊ शकतो आणि शासनाची कोट्यवधी रुपयांची हानी होण्याची शक्यता आहे.

सखोल चौकशी व कठोर कारवाईची मागणी

स्थानिक नागरिक आणि सामाजिक संघटनांनी या संपूर्ण प्रकरणाची उच्चस्तरीय चौकशी करण्याची मागणी केली आहे. तसेच, अवैध उत्खनन व वाहतुकीत सामील असलेल्या वाहनांची ओळख पटवून त्यांच्यावर कठोर दंडात्मक कारवाई करावी, जेणेकरून भविष्यात असे प्रकार पुन्हा घडणार नाहीत.

आता पाहणे महत्त्वाचे ठरेल की प्रशासन या प्रकरणाची गांभीर्याने दखल घेते की नेहमीप्रमाणे हे प्रकरण दडपले जाते.