नगर परिषद घुग्घुससाठी पहिल्यांदाच हेलिकॉप्टर फ्लाय नकाशा तयार – ऐतिहासिक पाऊल

चांदा ब्लास्ट

घुग्घुस (चंद्रपूर): चंद्रपूर जिल्ह्यातील नगर परिषद घुग्घुससाठी पहिल्यांदाच हेलिकॉप्टर फ्लाय नकाशा तयार करण्यात आला आहे. हा प्रकल्प केंद्र सरकारच्या नेशनल गिओस्पेशियल नॉलेज बेस्ड लँड सर्वे ऑफ अर्बन हॅबिटेशन अंतर्गत राबवण्यात आला आहे.

४२ फेऱ्या आणि २.५० तासांत सर्वेक्षण पूर्ण

या ऐतिहासिक उपक्रमांतर्गत ७ फेब्रुवारी २०२५ रोजी हेलिकॉप्टरने एकूण ४२ फेऱ्या पूर्ण केल्या आणि हे सर्वेक्षण २.५० तासांत पार पडले. भारतातील पहिल्यांदाच अशा पद्धतीने नगर भूमीचे हवाई सर्वेक्षण करण्यात आले आहे. या आधुनिक तंत्रज्ञानाच्या मदतीने संपूर्ण शहराचा डिजिटल नकाशा उपलब्ध होईल, जो शहराच्या विकास, भूव्यवस्थापन आणि आपत्ती व्यवस्थापनासाठी उपयोगी ठरेल.

घुग्घुसच्या भविष्याला नवी दिशा

पूर्वी घुग्घुसला आपत्तीप्रवण शहर म्हणून ओळखले जात होते, परंतु या अत्याधुनिक मॅपिंग तंत्रज्ञानामुळे शहराला नवा वेग मिळणार आहे. याआधी येथे अचूक भूमापन आणि नकाशे उपलब्ध नसल्याने अनेक समस्या उद्भवत होत्या, मात्र आता डिजिटल मॅपिंगमुळे सर्व समस्या जलदगतीने सोडवता येतील.

अधिकारी आणि मान्यवरांची उपस्थिती

या ऐतिहासिक प्रसंगी नायब तहसीलदार चंद्रपूर मनीष धोटे, सचिन कांडाले, जितेंद्र गादेवार (नायब तहसीलदार, चंद्रपूर), विशाल वाद्य (मुख्याधिकारी), भूषण मोहिते (जिल्हा अधीक्षक, भूमी अभिलेख, चंद्रपूर) यांच्यासह विविध राजकीय नेते, नगर परिषद अधिकारी-कर्मचारी आणि सामाजिक कार्यकर्ते उपस्थित होते. कार्यक्रमाच्या शेवटी विक्रम क्षीरसागर यांनी आभार प्रदर्शन केले.

ही ऐतिहासिक पुढाकार घुग्घुसच्या उज्ज्वल भविष्यासाठी एक महत्वपूर्ण पाऊल ठरेल आणि शहराच्या विकासाला गती देईल.