सांगोडा ग्रामपंचायतची अनियमितता चव्हाट्यावर!

चांदा ब्लास्ट प्रतिनिधी. प्रा. अशोक डोईफोडे

कोरपना – सांगोडा ग्रामपंचायतमधील विविध प्रकल्पांसाठी आलेल्या सरकारी निधीच्या वापरात अनियमितता आढळल्याने ग्रामस्थांमध्ये संताप आहे. सदर गंभीर बाबीची तक्रार जिल्हा परिषदेच्या मुख्य कार्यकारी अधिकाऱ्याकडे ग्रामस्थांनी तक्रार केली आहे.

       ग्रामपंचायतने सरकारी निधीचा अपव्यय करून खोट्या वाउचरच्या आधारे निधी हडपल्याचे गंभीर आरोप करण्यात आले आहेत. सविस्तर वृत्त असे की, दिनांक ६ ऑगस्ट २०२२ ला भोंगळे कम्प्युटर अपसेट कोरपना यांच्याकडून जिल्हा परिषद शाळा, सांगोडा येथील विद्यार्थ्यांना शैक्षणिक साहित्य वाटप रक्कम २० हजार रुपयांचे साहित्य दिल्याचे ग्रामपंचायतच्या कॅशबुकवर नोंद आहे. मात्र जिल्हा परिषद शाळेला याबाबत विचारणा केली असता यादरम्यान ग्रामपंचायतकडून शाळेला कोणत्याही प्रकारची साहित्य न मिळाल्याचे लेखी ग्रामस्थांना देण्यात आले आहे.

       विशेष म्हणजे, अपंगांच्या कल्याणासाठी आलेल्या निधीतही अफरातफर झाल्याचे उघडकीस आले आहे. अपंग व्यक्तींसाठी मंजूर केलेला निधी योग्य प्रकारे खर्च न करता बनावट बिलांचे वाउचर दाखवून पैसा लाटल्याचा आरोप ग्रामस्थांनी केला आहे. १० मार्च २०२२ ला ग्रामपंचायतीने प्रति लाभार्थी ३००० प्रमाणे रोख रक्कम २१ हजार रुपये दिव्यांगांना वाटप केल्याची नोंद ग्रामपंचायतच्या कॅशबॅकवर आहे. मात्र २०२२ मध्ये कोणतीही रक्कम मिळाली नाही असे अपंग लाभार्थ्यांनी दिलेल्या बयानामध्ये नमूद आहे.

      सरपंच संजना बोंडे यांचे पती सचिन बोंडे २०१५ ते २०२० या पंचवार्षिकमध्ये सरपंच होते. त्यांचे संयुक्त कुटुंब असताना ग्रामपंचायत निवडणूकीसाठी उमेदवारी अर्ज सादर करताना शौचालय असल्याचा दाखला जोडला होता. परंतु सरपंच पदावर असताना सन २०१९ या वर्षात वडील प्रभाकर गंगाराम मुंडे यांच्या नावे ग्रामपंचायतीकडून वैयक्तिक शौचालयाचा लाभ घेऊन शासनाची फसवणूक केल्याचा आरोप सुद्धा करण्यात आला आहे.

       अशा अनेक गैरप्रकाराची जिल्हा परिषदेचे मुख्य कार्यकारी अधिकारी यांच्याकडे लेखी तक्रार करण्यात आली असून तक्रारकर्ते रवींद्र देवाळकर यांनी चौकशीची मागणी केली आहे.