अखेर चकबोथली ग्रा.पं.वर भाजपाचा भगवा झेंडा फडकला…

चांदा ब्लास्ट प्रतिनिधी. नंदु गुद्देवार

         देशभरात माता दुर्गाचा नवरात्रोत्सव सुरू आहे. देशात सगळीकडे स्त्री शक्तीचा जागर आणि जयजयकार होत आहे. या दुर्गोत्सवामध्ये चकबोथलीच्या दुर्गा मारोती नखाते या सरपंच रुपी सिंहासनावर आरूढ झाल्या याला दैवी संकेतच म्हटले तर वावगे ठरणार नाही.सरपंच दुर्गाबाईच्या रूपाने गांवाला विकासाची दिशा मिळून गांव समृद्ध आणि भरभराटीला येईल असा आशावाद व्यक्त करून ब्रह्मपुरी विधानसभेचे लोकप्रिय माजी आमदार प्रा.अतुलभाऊ देशकर यांनी दुर्गाबाई व त्यांच्या सर्व सहकारी ग्रा.पं. सदस्यांचे अभिनंदन करून भावी वाटचालीसाठी शुभेच्छा देतांना भारतीय जनता पार्टी आपल्या पाठीशी सदैव खंबीरपणे उभी आहे. असा विश्वास देऊन भविष्यात गावाच्या विकासासाठी जी काही करावे लागेल ते भारतीय जनता पार्टी निश्चितच करेल असा दिलासा दिला.

        ब्रह्मपुरी तालुक्यातील चकबोथली ही ग्रा.पं. ही सात सदस्यीय ग्रामपंचायत असून सुरुवातीला येथे काँग्रेसचे चार आणि भाजपाचे तीन सदस्य असल्यामुळे सत्ता काँग्रेसच्या हातात होती. मात्र विद्यमान सरपंच दुर्गाबाई मारोती नखाते यांनी दोन-तीन महिन्यापूर्वी राजीनामा दिल्यामुळे हे पद रिक्त झाले होते. काल दिनांक 20 ऑक्टोबर रोजी सरपंचपदाच्या निवडणुकीत भाजपाकडून सरपंच पदाच्या उमेदवार दुर्गाबाई मारोती नखाते यांनी बहुमत सिद्ध केले आणि चकबोधली ग्रामपंचायत वर भारतीय जनता पार्टीचा झेंडा फडकविला.माजी सरपंच तथा ग्रा.पं.सदस्य मोहन किसन राऊत, सौ.रोहिणी कालिदास मैंद,सौ. निराशा योगीराज सौंदरकर, इत्यादींनी दुर्गाबाईला मतदान करून सरपंच पदी विराजमान केले. निवडणूक प्रक्रिया निवडणूक अधिकारी श्री.भाकरे, तलाठी चंदा ठाकरे ,ग्रामसेवक ठाकरे यांनी पूर्ण केली.