गिट्टी खाणीत मासेमारी करणे बेतले जीवावर – राखेच्या ढिगाऱ्याखाली दबुन पित्यासह तरुण मुलाचा मृत्यु

नंदोरी गावात मोठ्या प्रमाणात काळ्या गिट्टीच्या खाणी आहेत. गेल्या कित्येक वर्षांपासून या परिसरात शेकडो खोल खड्डे खोदून गौणखनिजाचे उत्खनन केले जात आहे. खड्डे खोदल्यानंतर सदर खाणी माती व रेती भरून समतल करण्याचे नियम असुनही ह्यासाठी येणारा खर्च तसेच शासनाचा महसूल वाचवण्यासाठी गिट्टी खाण मालक हे खड्डे बुजविण्यासाठी औष्णिक विद्युत केंद्रातून निघालेल्या राखेचा वापर करीत असून हा प्रकार नियमांच्या विरुद्ध आहे.

उत्खनन झाल्यानंतर तयार झालेल्या व न बुजविण्यात आलेल्या खड्ड्यांमध्ये पाणी साचले असून तिथे माशांची उत्पत्ती झालेली आहे. येथील जैन यांच्या गिट्टी खाणीत स्थानिक मजूर रामचंद्र जंगेल व योगेश जंगेल हे दोघे बापलेक मंगळवार दिनांक 19 डिसेंबरला सायंकाळी मासे पकडण्यासाठी गेले होते. पाण्याजवळ जात असतानाच अचानक राखेचे ढिगारे खचल्याने ते त्यात दाबले गेल्याने त्यांचा मृत्यु झाला.

घटनेची माहिती सोबतच्या दोन मुलांनी गावात जाऊन सांगितली. त्यानंतर पोलीस व महसुल विभागाला घटनेची माहिती देण्यात आली. दोन्ही विभागांनी युद्धस्तरावर दोघांचाही शोध घेण्याचा प्रयत्न सुरू केला असुन घटनेनंतर तब्बल 20 तासांनी योगेश जंगेल ह्याचा मृतदेह शोधण्यात प्रशासनाला यश आले तर बातमी लिहीत पर्यंत वडिल रामचंद्र जंगेल ह्यांचा शोध लागलेला नाही असे सुत्रांनी सांगितले.